‘O Pate

Pe tutta ‘a vita st’ommo te sta accante, e tu a stiente, t’accuorge che sta llà; p’e figlie fa ‘e tutt, e nun se vante, e soffre spisso senza mai parlà. —

E comme San Giuseppe, zitt e muto, s’abbraccia ‘a croc e fa ‘o vulere ‘e Dio: fatic, prega e resta scanusciut, e quante chiagne … chiagne, t’o dich’io!

Si pure tene ‘mpietto nu dulore, ‘o stesso, p’à fatica, esce ‘a matina; p’a famiglia, è ‘ nu martire d’ammore, all’ufficio, ‘o negozio o all’officina.

Te vò bene, e t’o dice quasi maje, te fa l’elogio, si nun staje presente; te vase ‘n fronte, quante a durmì staje: pè ‘na carezza, gode overamente.

Si te richiama, ‘o ffa pè vero amore: pe te dà gioia, soffre tutt’e ppene; e ogni ghiurno se consuma ‘o core si tu nu’ studie o lasce ‘a via d’o bene.

Ogni anno isso cammina assai chiù llent; s’arrappa ‘a pelle, e cagnano ‘e capille; si tu’o stai a sentì, ‘o fai contento pecchè è pate, è viecch è piccerillo.

Salutalo quante jesci e quante tuorne, e falle qualche vota ‘na carezza: t’accurge ampressa ca te gira attuarne, suspiruso ‘e te fa ‘na tenerezza.

‘O bene che fa ‘o pate l’annasconne, pecchè è ommo … e l’ommo accussì fa: tanne ‘o figlio se sceta ‘a dint’o suonne, quante se sposa e addeventa iss’o pate!